Ziyâsından o vechi âfitâbı görmeden bildim

Siyeh kâkülden itmişdir nikâbı görmeden bildim

Füsûn-ı çeşmini ‘uşşâkına ta‘rîfe hâcet yok

Nasıl mahmûrdur ol mest-i şarâbı görmeden bildim

Yine kûyında bir meclis müheyyâ eyledi ‘uşşâk

Ciger-sûzumdur ol bezmiñ kebâbı görmeden bildim

Nola tâ subha dek feryâd iderse ‘âşık-ı bîmâr

Der-i dildâra vardır intisâbı görmeden bildim

Kevâkib sayma kâbil mi semâda ey meh-i rahşân

Seniñ ‘uşşâkıñıñ olmaz hisâbı görmeden bildim

Aceb kimdir diyü dildârıma Leylâ'yı sormuşlar

Yatur ser-mest ü hayrân ol harâbı görmeden bildim

Hezârân âferîn eş‘ârına Nûrî-i merhûmuñ

İdermiş mürdeler ihyâ hitâbı görmeden bildim

Son Yazılar