Lutf eyle bu şeb bezmime çeşmiñ süzerek gel

Lutf eyle bu şeb bezmime çeşmiñ süzerek gel

Yek-reng olup ‘uşşâk ile mey nûş iderek gel

Üftâdeleri silsile-i zülfüñe çek gel

Öldür beni isterseñ eger meclise tek gel

Rahm eyle baña başıñ içün zülf-i kemendim

Gördüm seniñ etvârıñı gâyetle begendim

Yüz virme o agyâr-ı siyeh-rûya efendim

Öldür beni isterseñ eger meclise tek gel

Dikkatle nigâh itmege dildâra utandım

Billâhi o âteş gibi ruhsârına yandım

Cevr itmek ile sanma ki ben senden usandım

Öldür beni isterseñ eger meclise tek gel

Zâlim seni gördükçe idersem nola efgân

Lâyık mı idersiñ beni hicrân ile giryân

Matlûbuñ ise bagrı yanık bülbül-i nâlân

Öldür beni isterseñ eger meclise tek gel