Yâd-ı ruhsârıñla eşkim cûy-bâr itdim bu şeb

Yâd-ı ruhsârıñla eşkim cûy-bâr itdim bu şeb

Dâglarla sînemi reşk-i bahâr itdim bu şeb

Vaslıñ itdikçe tahayyül gülşen-i endîşede

Tâ seher feryâd u zârım çün hezâr itdim bu şeb

Zîr-i fesden dün perîşân seyr idüp kâkülleri

Akl u fikri ben de yâ hû târ-mâr itdim bu şeb

Zâhidâ fürkat deminde bâde nûş itdiklerim

İtme ta‘yîb ârzû-yı la‘l-i yâr itdim bu şeb

Gevher-i ‘aşk aldım ammâ tuhfe ihdâ eyleyüp

Göñlümi ol şâh-ı hüsne yâdigâr itdim bu şeb

Sarf idüp gencîne-i dilden nukûd-ı eşkimi

Hâk-i pây-ı dilbere cevher nisâr itdim bu şeb

Ârız-ı âliñle tîg-i gamzeñ itdikçe hayâl

Fürkatiñle cism-i zârım dâg-dâr itdim bu şeb

Zülf-i şeb-rengiñle bu baht-ı siyâhım yâd idüp

Dûd-ı âhımla yine dünyâyı târ itdim bu şeb

Dilde Leylâ dâg açup ser-tîz-i ebrûlarla âh

Dâglarla sînemi reşk-i bahâr itdim bu şeb