Ukde-i gam vaktidir olursa hall nevrûzda

Ukde-i gam vaktidir olursa hall nevrûzda

Zevk u şevk eyyâmıdır neyler kesel nevrûzda

Zâhid-i sad sâle mest olsa yine mazûrdur

Zühd ü takvâya gelir zîrâ halel nevrûzda

Iyd geçti nevbahâr erdi yüzün göstermedi

Bârî ol sultân-ı hüsn öptürse el nevrûzda

Durdu devletin yine dîvânâ defterdâr-ı gül

Âleme mihr etti tecdîd-i hamel nevrûzda

Lâle sâki goncalar sermest ü nergis pür humâr

Câm-ı mey nûş etmek ancak mâhasal nevrûzda

Cân u dilden tâzelerdik biz de eski derdimiz

Köhne meyle olsa hemdem bir güzel nevrûzda

Nice üstâd-ı sühen var bâhüner ammâ biri

Eylesin Nefî gibi tarh-ı gazel nevrûzda

Söyleten anı da bir kân-ı keremdir yoksa el

Söylemezdi bülbülâsâ bîmahal nevrûzda

Ol vezîr-i nükteperver ki dil ü tâb ehline

Medhin etmek oldu aksâ-yı emel nevrûzda

Nitekim câm-ı hilâl-i ıydi gerdân ede çarh

Nitekim ola mahal mihre hamel nevrûzda

Gündüzü ıyd u leyâli kadr olup eyyâmının

Pâyine yüz sürsün erbâb-ı düvel nevrûzda