Bahâr erdi yine esti nesîm-i subh-ı nevrûzî

Bahâr erdi yine esti nesîm-i subh-ı nevrûzî

Açıldı âlemin gül gibi güldü baht-ı fîrûzı

Hevâlarda letâfet ol kadar ki bülbül-i zârın

Nice tesîr eder bilmem güle âh-ı cigersûzı

Figân-ı nîmşebden nice mahrûm olmasın bülbül

Uyardı yine her gül bir çerâğ-ı âlemefrûzı

Bahâr erdi açıl lâle gibi dâğ-ı dilin göster

Derûnunda koma rind isen efkâr-ı gamendûzı

Ele gül gibi câm al bülbül-i sermest ol ey Nefî

Gazeller söyle germ et bezm-i şâhenşâh-ı nevrûzı

Duâya başla sonra cân u dilden Âsaf-ı ahde

Ki durdukça cihân devletle nevrûz ola her rûzı

O sâhib sadr-ı âlî şân ki lâyıkdır eğer olsa

Felek ferş-i harîm-i câhına bir nat-ı zerdûzı

Yegâne mesnedârâ-yı vezâret hâfız-ı devlet

Ki devr-i devletidir rûzigârın rûz-ı pîrûzı

Hudâ pâyende kılsın râyet-i baht-ı serefrâzın

Müyesser olsun ana günbegün ikbâl-i bihrûzı