Bahâr erdi yine gör feyz-i mihr-i âlemefrûzı

Bahâr erdi yine gör feyz-i mihr-i âlemefrûzı

Nice germ etti bir câm ile bezm-i şâh-ı nevrûzı

Acep mi düşse âteş âşiyân-ı bülbüle yer yer

Uyardı yine her gül bir çerâğ-ı hânümânsûzı

Açıldı câbecâ nergis miyân-ı sebzede güyâ

Döşendi bezmgâh-ı âleme bir nat-ı zerdûzı

Gedâ şâhâne işret edecek demdir ki olmuştur

Zemîn evreng-i pîrûze zamân eyyâm-ı pîrûzı

Zemîn sersebz ü ebnâ-yı zamân hoşhâl ü hürremdil

Zihî tesîr-i nevrûzî zihî ikbâl-i bihrûzı

Olur mu böyle bir rûz-ı mübârek dahi ey Nefî

Ki hem nevrûz ola hem lutf-ı şâhenşâh ola rûzı

Ol şâhenşâh-ı dânâ dil ki olmuştur adâletle

Mühimsâz-ı cihân akl-ı selîm-i dânişendûzı

Şeh-i Cem rütbe Sultân Ahmed-i ferhunde talat ki

Bahâr-ı bâğ-ı devlettir cemâl-i âlemefrûzı

Vücûduyla şeref bulsun serîr-i saltanat dâim

Cihân durdukça dursun ıyd u Kadr olsun şeb u rûzı