Nice dilşâd olmasınlar şeyh u şâb-ı Edrine

Nice dilşâd olmasınlar şeyh u şâb-ı Edrine

Şehri teşrîf etti Şâh-ı kâmyâb-ı Edrine

Sâyesinde şenliğe yüz tuttu sertâser yine

Oldu yeksân cây-ı mamûr u harâb-ı Edrine

Ol kadar etti sirâyet feyz-i hulk u meşrebi

Kevser ü müşk oldu hep âb u türâb-ı Edrine

Nükhet-i hulkuyla hoş bûy oldu hâki ol kadar

Rûmu Çîn etti şemîm-i müşknâb-ı Edrine

Meşreb-i şûhunda bir sır var ki tesîr eylese

Zâil olmaz haşre dek keyf-i şarâb-ı Edrine

Yaraşır Nefî bu şiir-i âbdârî âleme

Bergüzâr eylerse mânend-i gülâb-ı Edrine

Açtı hurrem etti zîra gül gibi endîşesin

İltifât-ı pâdişâh-ı Cem cenâb-ı Edrine

Makdemiyle Edrine tahtın müşerref edeli

Oldu her iklîme gâlib âb u tâb-ı Edrine

Hazret-i Sultân Murâd-ı kâmrân ki Hak vere

Eyleye devletle zevk-i bîhisâb-ı Edrine