Nice bir dil gam-ı zülfünle perîşân olsun

Nice bir dil gam-ı zülfünle perîşân olsun

Göreyin zülfünü ki hâk ile yeksân olsun

Eylesin bâd-ı saba zülfünü ko hamderham

Dil-i dîvâneyi bend eylemek âsân olsun

Başlasın bend ile raksa dil-i dîvâne dahi

Nice bir bâd-ı sabâ silsilecünbân olsun

Ne dokunsun dil-i erbâb-ı gama zülfünde

Ne perîşânî-i cemiyyet-i yârân olsun

Dil-i Nefî gibi geçmezse bu sevdâdan eğer

Her ser-i mûy ana bir ejder-i pîçân olsun

Deste deste edip ol zülf-i dütâyı bârî

Hâkrûb-ı der-i şâhenşeh-i devrân olsun

Hân Murâd ol şeh-i zî şân ki Hudâ’dan dilerin

Haşre dek devlet ile âleme sultân olsun

Âlemi kevkebe-i şevket ü şânı tutsun

Pâdişâhan-ı cihân bende-i fermân olsun

Âb-ı adliyle cihân bâğ-ı behişte dönsün

Bûy-ı hulkiyle sabâ micmeregerdân olsun