Kalmadı gam sâye-i lutfuñda ey zıll-i Hudâ

Reşk-i me’vâ oldı dünyâ her mahal cây-ı safâ

Makdem-i pâkiñ virüp kasr-ı Küçüksu'ya ziyâ

Bendegânıñla hemân zevk eyle şâhım dâ’imâ

Mülk-i ‘âlemde safâ itdikçe ey sâhib-kırân

Nevk-i tîriñ sîne-i a‘dâya saplansun hemân

Tâ-be-mahşer düşmen-i bed-kîşiñe virme amân

Bendegânıñla hemân zevk eyle şâhım dâ’imâ

Tal‘atıñ virdikçe heft iklîme şâhım zîb ü fer

Şâ‘irân evsâf-ı zâtıñda neler söyler neler

Tâze şarkılarla hep âfâkı tutsun nagmeler

Bendegânıñla hemân zevk eyle şâhım dâ’imâ

Mihr ile mâhı hacîl itmez mi nûr-ı tal‘atıñ

Rûy-ı dünyâyı münevver itdi mihr-i şevketiñ

Kullarıñ oldukça sâyeñde garîk-i ni‘metiñ

Bendegânıñla hemân zevk eyle şâhım dâ’imâ

Tâze şarkı söyleyüp Leylâ kuluñ leyl ü nehâr

Turmayup vasf-ı hümâyûnuñla eyler iftihâr

Reşk ile yansun ‘adû oldukça lutfuñ âşikâr

Bendegânıñla hemân zevk eyle şâhım dâ’imâ

Son Yazılar