Hâlime rahm eyle bak ey dilber-i ‘âlî-cenâb

Çeşmime zindân olur sensiz olursa âfitâb

Sen de rahm itmezsiñ ey zâlim dil-i pür-sûzıma

Sîh-i fürkatle idersiñ bagrımı her dem kebâb

Sen safâ itdikçe ‘ömrüm rûz u şeb agyâr ile

Ben iderdim bezm-i gamda eşk-i pür-hûnum şarâb

Renc ü mihnet çekmeyeydik itmez idik şekvâ yine

Vasl-ı dilberle olaydım bir kez olsun neş’e-yâb

Kâfir olmazsıñ eger itseñ baña ‘arz-ı cemâl

Yâ nolur ‘uşşâkıñı vaslıñla itseñ kâm-yâb

Âşık-ı dil-hastelerden vaslıñı itme dirîg

Bu dil-i mahzûnımı cevriñle gel itme harâb

Son Yazılar