Ezelden nârına aşkın yana geldim cihân içre

Ezelden nârına aşkın yana geldim cihân içre

Akıtdım nice dem yaşlar gözümden dolu kan içre

Hak ile bî-nişân iken kamu cânlara cân iken

Düşüdr bî-mekân iken beni kevn ü mekân içre

Nice geldim nice gitdim nice doğdum nice öldüm

Nic'açıldım nice soldum şu gül gibi cihân içre

Bulut olup göğe ağdım matar olup yere yağdım

Güneş olup gehî doğdum zemîn ü âsumân içre

Nebât olup nice devrân nice demde olup hayvân

Geyirdi sûret-i insân bana devr-i zamân içre

Çün insân sûretin buldum Hakk'a hamd ü senâ kıldım

Fenâ-ender-fenâ oldum bekâ-yı câvidân içre

Erişdi ma'rifet nûru gönül oldu Hakk'ın Tûru

Niyâzî duydu çün sırrı kemâl buldu ayân içre