Dün geldim o cüvân ile meclisde bir yere

Beñzetmiş ebruvânını keskîn hançere

Çeşm-i siyâhı katlime mecbûr olur hemân

Arz eyledikçe hâlimi biñ kerre dilbere

Bîhûde itme kan meded kıyma cânıma

Lutf eyle tîr-i gamzeñi sarf itme yok yere

Râhıñda ‘âşık itse deger mâ-melek fedâ

Lâyık degil mi vaslı hazîneyle cevhere

Yandım tutuşdum nâr-ı mahabbetle her şeb âh

Murg-ı dilim de oldı müşâbih semendere

Arz eyler idim Hazret-i Allâh'a hâlimi

Ol mehle mâ-cerâmız eger kalsa mahşere

Leylâ o şahsa âteş-i dûzah ba‘îd olur

Kim ki tekarrub eyleye evlâd-ı Hayder'e

Devlet ararsañ dergeh-i Monlâ Celâl'e gel

Câvid ölür mi bende olan öyle servere

Son Yazılar