Devâdır hâk-i kûyuñ haste-gâna yâ Resûlallâh

Şifâ bahş itdi nutkuñ cism ü câna yâ Resûlallâh

Kevâkib saymadan ‘isyânımıñ ta‘dâdı müşkildir

Eger ‘afv itmeseñ sıgmaz cihâna yâ Resûlallâh

Buyurduñ ümmetim ‘isyân ider âhir zamân olsa

Meseldir ‘afv olur hâl-i zamâne yâ Resûlallâh

Huzûra varmaga bâr-ı günehden yok mecâlim vâh

Şebâbetde dönüp kaddim kemâna yâ Resûlallâh

Be-hakk-ı Hazret-i Zehrâ terahhum eyle bir kerre

Yanup yakıldıgım dem ‘âşıkâna yâ Resûlallâh

Ne rütbe aglasam ‘isyânımıñ bir zerresi olmaz

Boyansa aglamakdan dîde kana yâ Resûlallâh

Bu kara yüzle dûzahdan dahi şerm eylerim billâh

Degil Leylâ kuluñ lâyık cinâna yâ Resûlallâh

Son Yazılar