Bugün Ya'kûb-ı kalbe Yûsuf-ı cândan haber geldi

Bugün Ya'kûb-ı kalbe Yûsuf-ı cândan haber geldi

Kamîs-i pür nesîm ile o cânândan haber geldi

Açıl ey gözlerim envâr-ı vech-i zü'l-celâlîden

Dilâ bedr ol kim o mihr-i dirahşândan haber geldi

Yerinme nâkısım deyü kemâl ehlini gördükçe

Kamu noksânı tekmîl eden insândan haber geldi

Edip dil-hâneyi ta'mîr otur bu beyt-i ahzânda

Bu şeb bana seher vaktinde mihmândan haber geldi

Ne kim yağmâ olundu çekme gam şimden gerü sen var

Dil-i virândaki ol kenz-i pinhândan haber geldi

Bu Mısrî'nin vücûdu mısrının oldur şehinşâhı

Ezelden tâ ebed hükm-i Süleymân'dan haber geldi