Bahâr eyyâmıdır bir kerre cânâ ‘azm-i bâg olsun

Açılsun lâleler ‘aşkıñla sînem dâg dâg olsun

Müheyyâ oldı bir meclis ne meclisdir behişt-âsâ

Hep erbâb-ı safâ gelsün de agyâra yasag olsun

O şâh-ı kişver-i hüsnüñ olursa baña ihsânı

Gelüp dîvâne göñlüm yansun ammâ pür-çerâg olsun

Dimiş agyâr-ı bed-çihre o şûha bezme gel bir şeb

Bu nâ-hoş sözleri gûş eyleyenlerden ırag olsun

Haber-dâr eyleyiñ yâri mübârek rûz-ı ‘îd oldı

Elin ‘uşşâka öpdürmez ise bârî ayag olsun

Eger rahm eyleyüp bir kez su’âl eylerse Leylâ'yı

Telefdir râh-ı ‘aşkında anıñ koçbaşı sag olsun

Son Yazılar