Târik-i dünyâyı gözler evliyâ evlâ görür

Aynına almaz avâmun aynını a’mâ görür

Gözi açuklarla manzûr-ı ulü'l-ebsâr olur

Mest-i câm-ı vahdeti bî-bâk ü bî-pervâ görür

Kendüni yoklukda yokla âlem-i envâra var

Sûfî-i sâfî der-i lâdan geçer illâ görür

Halkı büyük gösteren âyînedür gerdûn-ı dûn

Bilmeyenler serçe iken kendüyi ankâ görür

Cânib-i Hakka teveccüh eylese ehl-i safâ

Aynı ile Ka’be-i maksûdını peydâ görür

Görmemek yeğdür o görmekden Hudâ göstermesün

Mâyil-i dünyâ düşinde muttasıl dünyâ görür

Bildüği yanılduğına değmez ey Yahyâ müdâm

Her baka bilmez bu fânî âlemi zîbâ görür

Taşlıcalı Yahya

Son Yazılar