Jâlelerden takınur tâcına gevher lâle

Şâh olupdur çemen iklîmine beñzer lâle

Saltanat bârgehin kurdı yine fasl-ı bahâr

Taht-ı Cemşîd çemen tâc-ı Sikender lâle

Bûy-ı müşgîn-i bahâr irdi dimâg-ı dehre

Yakalı dâmen-i kühsârda micmer lâle

Âl fânûs ile geldi giceden gül-zâra

Virdi sahn-ı çemenüñ yollarına fer lâle

Ergavânlar tutışup hırmen-i gül yanmag içün

Gülsitân milkine âteş kodı yir yir lâle

Dâg-ı hicrân elemin kılmaga dilden bîrûn

Sahn-ı gülşende tutar gül gibi sâgar lâle

Jâle nakdin kadehe koydı çemen bezminde

Cem’ idüp saklamadı gonca gibi zer lâle

Şol kadar togradı şemşîr-i firâkuñ ki gören

Dil-i hûnini hayâl eyledi katmer lâle

Zînet-i gülşen-i ikbâle yiter ey Bâkî

Çihre-i baht-ı şehenşâh-ı muzaffer lâle

Son Yazılar