Devlet anuñdur ki âmennâ diye irşâdıma

Devlet anuñdur ki âmennâ diye irşâdıma

Ḫışm ider ḥûr u melâ’ik münkir u murtâdıma

Luṭfını ḳahrında pinhân eyledi ol pâdişâh

Derdini dermân virüpdür âhıma feryâdıma

Küfr ü ẓulmet ḳapladuḳça bu vücûdum mülkini

Tevḥîd-i ẕâtıñ nûrı irgürdi ‘adl u dâdıma

Aşḳa fermân olmasun gör ey şikârın yañılan

Görmedi ‘aşḳıñ belâsın ḥayf ola şol âdeme

Kim bilür virse ḫaber kim yandıran kimdür beni

Bilmezem ben kendi elimden mi yandum odıma

Mürşide dil virmeyince bulmadı ḳalb-i selîm

Aşḳ-ıla yur ḳalbini ẕâkir ḳılan evrâdıma

Dôst cemâli şem‘iniñ pervânesiyem her nefes

Lâ dimezseñ gel berü zâhid benüm mu‘tâdıma

Aşḳı gör sırran vücûdum bir ‘imâret eyledi

Bî-nişân u lâ-mekân şevḳı gelür bünyâdıma

Sırr-ı Aḥmed ḥaccınıñ beytin ziyâret ḳıldı cân

Gördügüm eydür mübârek ḥaccıñuz me‘âdıma

Kâ’inâtı ‘ârifâne seyr idenlerden recâm

Añlayan bu remzi raḥmet oḳusun üstâdıma

İsm-i a‘ẓam bî-nişân u lâ-mekân şehrindedür

Şehr-i Elmalı Sinân Ümmî oḳurlar adıma