Bize Firdevs-i a‘lâdan dîzârıñ zevkı hôş geldi

Bize Firdevs-i a‘lâdan dîẕârıñ ẕevḳı ḫôş geldi

Gören ‘âşıḳlara âh-ıla zâruñ ẕevḳı ḫôş geldi

Alursañ yoluña cânım fedâ olsun senüñ yâ Rab

Ḫıyâliñ câna bey‘ eyler bâzârıñ ẕevḳı ḫôş geldi

Görüben verd ü reyḥânı öter cân bülbüli her dem

Gerekmez bâġ u bûstânı gülzârıñ ẕevḳı ḫôş geldi

Bugün Manṣûr-ı Baġdâdıñ kemâlin ‘azm ider cânım

Yoluñda cân u ser virüp tozarıñ ẕevḳı ḫôş geldi

Hezârân kâmil ü dânâ senüñ vaṣfıñ oḳur yazar

Bize ‘aşḳıñ kitâbını yazarıñ ẕevḳı ḫôş geldi

Kimi ‘âbid kimi zâhid ṣızup yoluñda ḳâl olmış

Bize külḫân-ı ẕikriñde żarâruñ ẕevḳı ḫôş geldi

Naẓar ḳıl bu Sinân Ümmî yoluñda ḳomasın varlıḳ

Ki zirâ iki ‘âlemden güzârıñ ẕevḳı ḫôş geldi